ባቡር ንምቕያር እምበር፡ ንኻልእ ዝኸውን ጊዜ ኣይነበረንን። ንኣቓልቦይ ስሒቡ፡ ዘግ ዘብል ኩነት ምስ ገጠመኒ ግና፡ ኮፍ ከም ዘይብል እናተረድኣኒ፡ ንውሽጢ ኣትየ ክርኢ ደለኹ።

ኣብ ማእከል መዋፈሪ ባቡራት፡ ናይታ ያቭለ ተባሂላ እትጽዋዕ ሓንቲ ካብ ከተማታት ሽወደን እዩ። ሎሚ ረፋድ፡ 24 ግንቦት 2024፡ ከምዚ ኣብ ስእሊ እትርእይዎ ዘለኹም፡ ”ስዋ ኣሎና” ዝብል ብትግርኛ ዝተጻሕፈ ምልክታ ምስ ነበብኩ፡ ነተን ኣብ ኣፍደገ ገዝአን፡ ንመለሊኽ፡ ቁልቁል ኣፋ ኣብ ስላዕ ደፊአን ስዋ ዝሸጣ፡ (ኣየ ዚ ኣእምሮናስ ክረስሕ-- ”ኮማሮ” ዝብል ብህሎ እንካ በጨቕ በለ!) ብዝኾነ፡ ”እንዳ ስዋ” ገዛውትና ዘኪረ። 

ስዋ ኣብ ዕዳጋ ቀሪቡ ክውክለና ማለት ድዩ፧

ፊት ንፊተይ፡ ልዕሊ 50 ትሕቲ 70 ዝዕድሚኦም ክልተ ደቂ ዓድና ሰብኡት፡ በብያቲኦም ዘይኰነስ፡ ኣብ ሓደ መቐረብ እንጀራ መኣዲ ሒዞም፡ ወዋንጫኦም ዓቲሮም ረአኽዎም። ሓደ ኣብ ኣርብዓታት ዘሎ ዝመስል ምስ ሓንቲ ትሕቲ 10 ዓመት እትኸውን ንእሽቶ ጓሉ ይምስሑ፣ ሓንቲ ምናልባሽ ናብ ሰላሳታት እተጸጋግዐት ክትከውን እትኽእል ቋንቋ ኣምሓርኛ እትዛረብ ድማ ምስ ወዲ 7 ዓመት ዝኸውን ወዳ፡ ዝኣዘዝዎ ምስሖም ይወርደሎም ነበረ። ክልተ ሶማልያውያን ኮኾና ዝኽእላ መንእሰያት ኣዋልድ፡ መንበር ንምምራጽ ዕንይንይ ይብላ ነበራ። ተዓጣቓይ ንኻልኦት የሳሲ ብምንባሩ፡ ናብ ካሳ ከይደ፡ ነቲ ዝርዝር ምግብታትን መስተታትን ዝሓዘ ሰነድ ገንጸልክዎ። ጸጋማይ ኢደይ ዝሓዞ ምሉእ ገጽ፡ ”ስዋ ኣሎና” ዝብል ምልክታ ነበረ። ዋጋ ግና ኣይነበሮን።

”ስዋ ኣሎና” ብፊደላት ትግርኛ ጥራይ ምጽሓፉ፡ ንዓይ እኹል መልእኽቲ ነበረ። ስለምንታይ ብቛንቋ ሽወደን፡ ሓደው ስለምንታይ ብቋንቋ እንግሊዝ ኣይተጻሕፈን ንምግማቱ፡ ዓሚቝ ፍልጠት ዝሓትት ትንታነ ኣይመስለንን። ስዋ ጸሚቝኻ ንዕድጋ ምቕራብ፡ ኣብ ሽወደን ሕጋውነት ኣሎዎ ዶ፧ ኣብቲ ዝተፈላለየ ዓይነት ቢራ መራሪጽካ ክትዕድገሉ እትኽእል፡ ሃገር፡ ”ስዋ ኣሎና” ቢልካ ንዕዳጋ ምቕራብ፡ ብርግጽ፡ ኪንዮ ስራሕን መኽሰብን ዝሓልፍ፡ ካልእ ስምዒታት ዝነክእ መልእኽቲ ክህልዎ ከም ዝኽእል ግሙት’ዩ። ግና ስለምንታይ ብስዋ፧!

ነታ እትቕጽል ባቡር ከርክባ ስለ ዝነበረኒ እምበር፡ መንበር ኣጣጢሐ ኮፍ እንተዝብልሲ፡ ንወናኒ እታ ቤት መግቢ፡ ሓደው ነቶም ዋንጫኦም ዓቲሮም ዘንቈርቁሩ ዝነበሩ፡ ሓያሎ ሕቶታት መዝነብኩሎም እሞ፡ ሓያሎ ምስጢራት’ውን ምተመሃርኩ ይመስለኒ። ዝኾነ ኾይኑ፡ ዝሓሰብክዎ ከይሰለጠኒ፡ ባቡረይ ንምርካብ ተጓየኹ። ሰብ ያቭለ ኣለኹም ዶ፧ ንመለሊኽ ስዋ፡ ክንደይ ኮን ኢኹም እትዕድግዋ፧!