ሰንበት መጸ፡ ሓደው ቅዳሴ ኣብ ዝተሰርዓሉ ዘበለ፡ እቲ መራሒ ዛቝናይ፡ ሃዳዲ ድምጺ ተጠቒሙ፡ ”ንጐይታና ኢየሱስ ዘየፍቅሮ እንተሎ፡ . . . ውጉዝ ይኹን” ብምባል የፈራርሓና’ዩ። ነዛ መልእኽቲ’ዚኣ፡ ድገማ እንተዝብሃል፡ እቲ ዛቝናይ፡ ምናልባሽ ከምታ ሃዋርያ ጴጥሮስ ዝገበራ፡ ሓንቲ’ኳ ትኹን ለውጢ ቃል ከይገበረ ክደግማ ይኽእል ይኸውን። ሰልሳ፡ እንተዝብሃል ግና፡ ንገዛእ ርእሱ ክፈርድን ክዅንንን ስለ ዘይደሊ፡ ”ንጐይታና ኢየሱስ ዘየፍቅሮ እንተሎ፡ ውጉዝ ይኹን!” ንምባል ዝተብዕ ኣይመስለንን።

ሓለፋ ድንግል ማርያም ዶ ንጐይታና ኢየሱስ ነፍቅሮ ኢና፧ ሓለፋ እቲ ስም ቤተ ክርስቲያንና ዝስመየሉ ጻድቕ ዶ ንጐይታና ኢየሱስ ነፍቅሮ ኢና፧ ሓለፋ መላእኽቲ ዶ፡ ሓለፋ ምድራውያን ነገስታት ዶ፡ ሓለፋ ሰብ ጸጋን ሃብትን ዶ. . . ሓለፋ ካልኦት ዶ ኣብሊጽና ንጐይታና ኢየሱስ ነፍቅሮ ኢና፧

ሃዋርያ ጴጥሮስ፡ ”ካብዚኣቶም ኣብሊጽካ ዶ ተፍቅረኒ ኢኻ፧” ዝብል ሕቶ ምስ ቀረበሉ፡ ”እወ ጐይታይ፡ ኣነ ኸም ዘፍቅረካ፡ ንስኻ ትፈልጥ አሎኻ” ብምባል’ዩ ዝመለሰ። ኣብቲ ካልኣይ ጊዜ’ውን ነታ መልሲ፡ ሓንቲ’ኳ ትኹን ለውጢ ቃል ከይገበረ፡ ከም ዘላታ ጌሩ ደገማ። ንሳልሳይ ጊዜ፡ ተፍቅረኒ ዶ ኢኻ ምስ ተባህለ ግና፡ ጐሃየ፡ ዝብል ኢና እንነብብ፡ (ዮሃ21.15-17)።

ደጊም ነተን ቀዳሞት ክልተ ነጢርና፡ ኣብታ ሳልሰይቲ ንዕሰል። ”ስምኦን ወዲ ዮና” (ዮናስ ወዲ ወልዳት- ስምኩም ኣእቲኹም ንበብዎ)፡ ”ካብዚኣቶም ኣብሊጽካ ዶ ተፍቅረኒ ኢኻ፧” ዝብል ሕቶ’ዩ ዝቐርበልና ዘሎ። ”ካብዚኣቶም” ተባሂሎም ዘለዉ፡ ኣብታ እዋን እቲኣ፡ ምስ ጴጥሮስ ሓቢሮም ከም ዝነበሩ ተነጊሩና ዘሎ፡ ዲዲሞስ ዝብልዎ ቶማስን ናትናኤል ብዓል ቃና ገሊላን ደቂ ዘብዴዎስን ክልተ ኻልኦት ከኣ ካብ ደቀ መዛሙርቱን፡ እዮም፡ (ዮሃ21.2)። ሃዋርያ ጴጥሮስ፡ ልዕሊ እዞም ዝተጠቕሱ፡ ንጐይታ ዘፍቅሮ እንተዀይኑ’ዩ ዝሕተት ዘሎ።

”ካብዚኣቶም ኣብሊጽካ ዶ ተፍቅረኒ ኢኻ፧” ማለትሲ፡ ብኻልእ ኣዘራርባ፡ ቅድሚ’ታ ዓባይን ቀዳመይትን ትእዛዝሲ፡ ነታ እትመስላ ካልአይታ ትእዛዝ ዶ ኣይተቐድምን ኢኻ እዩ ዝብሃል ዘሎ። እታ ቀዳመይትን ዓባይን ትእዛዝ፡ ”ንእግዚኣብሄር ኣምላኽካ ብምሉእ ልብኻን ብዅሉ ነፍስኻን ብዅሉ ሓሳባትካን ኣፍቅሮ” እያ ትብል፡ () እታ ካልአይቲ እሞ ትጽንሓልና፡ ነዚኣ ንገብራ ዶ፧!

ምስ እንዳ ኣቡነ እከለ ዘለና

ካብቶም ዘለናዮም ንላዕሊ ኣብሊጽና ዶ ንጐይታ ነፍቅሮ ኢና፧ ምላሽና እወ፡ እንተዀይኑ፡ ነተን ዕያውቲ፡ እንታይ ከም እንምግበን፡ ነተን ኣባጊዕ ከመይን ካበይን ከም እንሕልወን፡ ኣበይ ከም እነውዕለን፡ እንታይ ከም እነስትየን ቅድም ንጐይታ ሰሚዕና ንግበሮ። እዝጊ ከይብለኒ ደኣ’ምበር፡ ሰብ ከይብለኒ ምባል መንፈሳውነት ኣይምሰለና። ኣዒንትና ቋሕ እንተበልናስ ንቕድም  እቲ ዝተሰቕለ ጐይታ ጥራይ ክርኣየና ኣለዎ።

ምስ እንዳ ኣቡነ እከለ ዘለኹም

ካብቶም ዘለኹሞም ንላዕሊ ኣብሊጽኩም ዶ ንጐይታ ተፍቅርዎ ኢኹም፧ ምላሽኩም እወ፡ እንተዀይኑ፡ ነተን ዕያውቲ፡ እንታይ ከም እትምግብወን፡ ነተን ኣባጊዕ ከመይን ካበይን ከም እትሕልውወን፡ ኣበይ ከም እተውዕልወን፡ እንታይ ከም እተስትይወን፡ ቅድም ንጐይታ ሰሚዕኩም ግበርዎ። እዝጊ ከይብለኒ ደኣ’ምበር፡ ሰብ ከይብለኒ ምባል መንፈሳውነት ኣይምሰልኩም። ኣዒንትኹም ቋሕ እንተበልኩምሲ፡ ንቕድም ነቲ ዝተሰቕለ ጐይታ ጥራይ ክርኣየኩም ኣለዎ።

እቶም ምስ ሲኖዶስ ኣስመራ ዘለኹም

ካብቶም ዘለኹሞም ንላዕሊ ኣብሊጽኩም ዶ ንጐይታ ተፍቅርዎ ኢኹም፧ ምላሽኩም እወ፡ እንተዀይኑ፡ ነተን ዕያውቲ፡ እንታይ ከም እትምግብወን፡ ነተን ኣባጊዕ ከመይን ካበይን ከም እትሕልውወን፡ ኣበይ ከም እተውዕልወን፡ እንታይ ከም እተስትይወን፡ ቅድም ንጐይታ ሰሚዕኩም ግበርዎ። እዝጊ ከይብለኒ ደኣ’ምበር፡ ሰብ ከይብለኒ ምባል መንፈሳውነት ኣይምሰልኩም። ኣዒንትኹም ቋሕ እንተበልኩምሲ፡ ንቕድም ነቲ ዝተሰቕለ ጐይታ ጥራይ ክርኣየኩም ኣለዎ።

እቶም ንውልቅኹም ተፈሊኹም ዘለኹም

ካብቶም ዘለኹሞም ንላዕሊ ኣብሊጽኩም ዶ ንጐይታ ተፍቅርዎ ኢኹም፧ ምላሽኩም እወ፡ እንተዀይኑ፡ ነተን ዕያውቲ፡ እንታይ ከም እትምግብወን፡ ነተን ኣባጊዕ ከመይን ካበይን ከም እትሕልውወን፡ ኣበይ ከም እተውዕልወን፡ እንታይ ከም እተስትይወን፡ ቅድም ንጐይታ ሰሚዕኩም ግበርዎ። እዝጊ ከይብለኒ ደኣ’ምበር፡ ሰብ ከይብለኒ ምባል መንፈሳውነት ኣይምሰልኩም። ኣዒንትኹም ቋሕ እንተበልኩምሲ፡ ንቕድም ነቲ ዝተሰቕለ ጐይታ ጥራይ ክርኣየኩም ኣለዎ።

ንጐይታና ብዘይሓልፍ ፍቕሪ ነፍቅሮ ዶ፧

ንልብና ንፈትሾ። ድቃስ ስኢንናሉ ዘለና፡ ምድሓን ነፍሳት ድዩ፧ ኣብ ኣርእስቲ ዕላልና ደሚቑ ዝልዓል፡ ኣብ ጸጽባሕ ዝድሕና ነፍሳት፡ ንሳተን ዝምገባኦ ትምህርቲ ድሕነት፡ ዝዓብያሉ ትምህርቲ ወንጌልን ኣገልግሎትን ድዩ፡ ወይስ እንታይ፧ ዕያውትን ኣባጊዕን ጐይታ ክንምግብን ክንሕሉንሲ ይትረፍ፡ ንገዛእ ርእስና ኸ ኣብቲ መጓሰ ጐይታ ኣለና ዶ፧ ድምጺ መን ኢና ክንሰምዕ ሃረር ንብል ዘለና፧ መን ክረድኣና ኢና ልብና ምስናይ ኣእዳውና ምሉእ መዓልቲ ዘርጊሕናዮ እንውዕል፧ ስብከትና መዝሙርና፡ ናብራና፡ ኣከዳድናና ኮታ ብቓል ኰነ ብግብሪ እንገብሮ ዘበለ፡ ኢየሱስ ጐይታ’ዩ ንምባል ትብዓት ዝህበና ዶ ይኸውን፧!

ዛቝናየ፡ ዛቑናየ፡ ሰንበት መጸ፡ ”ኵሉ ዘኢያፈቅሮ” ቢልካ ተፈራርሓኒ ኢኻ’ሞ፡ እቲ ብሃዳዲ ድምጺ እትእውጆስ፡ ኣስተውዒልካዮ ዶ ኣለኻ፧! ኣብዚ ጽሑፍ’ዚ፡ ኣነ እንተተዛሪበኩም፡ ንመልእኽተይ ረስዕዎ። ድምጺ ጐይታ እንተዀይኑ ግና፡ ከምቲ እቲ ጽሑፍ ዝብሎ፡ ”ዘቦ ዕዝን፡ ሰሚዐ ለይስማዕ” ዝብል’የ ዝደግመልኩም።

እግዚኣብሄር ይደግፍ!