መዐየሪና፡ ምንታወ-ንቡር (Double Standard) ድዩ፧

ፍሉጥ ኣመሪካዊ ቢሊ ግራሃም ኣብ መበል 99 ዓመት ዕድሚኦም፡ ኣብ ዓመተ 2018 ምስ ዓረፉ፡ ቢቢሲ ኣብ ዘቕረበቶ ጸብጻብ፡ ቢሊ ግራሃም፡ ኣብ ውሽጢ ልዕሊ 60 ዓመታት፡ ብዓሰርተታት ሚልዮናት ንዝቝጸሩ ብስራተ ወንጌል ከም ዝሰበኹ፡ መስከረት። ነቲ ጸብጻብ ንምንባብ ኣብዚ ጠውቑ  

ፍሉጥ ናይጀርያዊ፡ ቲቢ ጆሽዋ፡ ኣብ መበል 57 ዓመት ዕድሚኡ  ኣብ ዓመተ 2021 ምስ ዓረፈ፡ ቢቢሲ ኣብ ዘቕረበቶ ጸብጻብ፡ ቲቢ ጆሽዋ፡ ኣብቲ ኣብ ከተማ ሌጎስ ዝርከብ ኣጸዱ፡ ንልዕሊ 10 ዓመታት ዝቐጸለ፡ ጾታዊ ዓመጽን ግፍዕን ይፍጽም ምንባሩ፡ መስከረት። ነቲ ዝቐረበ ጸብጻብ ንምንባብ ኣብዚ ጠውቑ

 ካብዘን ዝስዕባ ኣማራጺታት ኣየነይተን ቅንዕቲ ትመስለኩም፧

• ሀ. ሓይሊ እቲ ቅብኣት ከምኡ’ዩ ዝገብር፡ ቢቢሲ ከይተረፈት ኣቃሊዓቶ

• ለ. ውጹእ ሓሶት’ዩ፡ ብቐደሙ ካብ ቢቢሲ ዶ ሓቂ ክትሰምዕ ኢልካ እዝንኻ ይጽሎ’ዩ

• ሐ. ዘረባ ሓደ ሰሚዕካ ኣይትፍረድ እዩ’ሞ፡ እስከ ብኻልእ ከኣ ከነረጋግጽ

• መ. ትንፈር ኣይትንፈር ጤል’ያ። እዛ ተረዲአያ ዘለኹ ጥራይ’ያ ሓቂ

 መርምሩ

ስለ ዝፈተኻዮ፡ ክትስልም፡ ስለ ዝጸላእካዮ ኸኣ ከተጸልም፡ ትመርጽ እንተዄንካ፡ ክርስትናኻ እሞ ይትረፍ፡ እቲ ሰብኣዊ ልቦናኻ ኸ ኣበይ ተሰወረ፧ ሰብ ኰይኑ ዘይጋገ የልቦን። ሰብ፡ መንፈሳዊ ምዃኑ እትመዝነሉ ኸኣ፡ ስለ ዘይጋገ ዘይኰነስ፡ ንይቕረታ ድሉው ምስ ዝኸውን’ዩ። ምንታወ ንቡር፡ ዝምቡዕ ፍርዲ ምሃብ እንተዀይኑ፡ ክርስቲያን ዘበለ፡ ካብ ምንታወ-ንቡር ተሓልዩ ርትዓዊ ክኸውን’ዩ ዝግብኦ።  ኣብዘን ቀሪበን ዘለዋ ክልተ ጸብጻባት፡ ኣብታ ናይ ቢሊ ግራሃም ጸብጻብ ክንምልከት ከለና፡ In 2002, Graham apologised after tapes emerged of him and Nixon making anti-Semitic remarks ዝብል ኣሎዋ። ክትርጐም ከሎ፡ “ግራሃም፡ ናቶምን ናይ ኒክሰንን ጸረ-ሴማዊ ዝዀነ ዝተቐርጸ ብህሎ ድሕሪ ምቕልቃሉ፡ ይቕረታ ሓቲቶም” ዝብል’ዩ። 

ንቲቢ ጆሽዋ ኣብ ዝምልከት ዝቐርብ ጸብጻብ፡ “ይቕረታ ሓቲቱ” ዝብል ዝርከቦ እንተዀይኑ፡ ፈትሹ። “ይቕረ ዘብል የብሉን”፡ ዝብል ርድኢት እንተለኩም’ውን ምንጪ ርድኢትኩም እንታይ ምዃኑ መርምሩ። ኮታ መዐየሪኹምሲ ምንታወ-ንቡር ዘይብሉ ምዃኑ ሃሰስ በልዎ ኢኹም።

ምዉት ኣይክሰስን

ብሱሩ፡ ንምዉታትሲ ምዉታት’ዮም ክቐብርዎም ዘለዎም። ከሰስናዮም ኣይከሰስናዮም’ውን፡ ደጊም ክልቲኦም ኣብዛ ዓለም የለውን። ማዕከናት ዜና፡ ብዛዕባ እቶም እነድንቖም፡ ጽቡቕ ኣብ ዝዛረባሉ፡ ከበሮ ሓምሓም ንምዝባጥ ክንጓየ፡ እንተነቐፋኦም ግና፡ “ልኡኻት ሳጥናኤል” ቢልና ጸለሎ ክንቀብእ እንጓየ እንተዄንና ግና፡ ኣብ “ምንታወ-ንቡር” (Double standard) ንሕምብስ ምህላውና ኣይንዘንግዕ። ምንታወ-ንቡር ድማ ክርስትናዊ መገዲ ኣይኰነን።

ምንታወ-ንቡር (Double Standard) እንታይ’ዩ፧

A principle or policy that is applied in a different manner to similar things, without proper justification

ቅኑዕ መርትዖ ከየሰነኻ፡ ንተመሳሰልቲ ነገራት ብዝተፈላለየ ኣገባብ ንምሓዝ እትጥቀመሉ፡ መርሖ-ህይወት ወይ ፖሊሲ፡- "ምንታወ-ንቡር" ይብሃል።