ምሸት ኰነ ብጊሓት’ውን ኰነ፡ ካልአይቲ መዓልቲ(ዘፍ1.8)

”ምሕላው መዓልትታትን ኣዋርሕን እሞ ከመይ ኣሎ፧” በለት ብርዐይ። ቃናኣ ባህ ኣይበለንን። ኣጣምታኣ’ውን ኣይፈተኽዎን። “2024 ካብ እንኣቱ፡ ሎሚ ካልአይቲ መዓልትና እያ’ሞ፡ ካብዞም ኣብ ኣርእስቲ ተጻሒፎም ዘለዉ፡ ‘ምሸት፡’ ‘ብጊሓት፡’ ‘ካልአይቲ መዓልቲ’ ከምኡ’ውን ‘ኰነ፡’ ዝብሉ ቃላት፡ ኣዒንትኻ ኣበይ ከም ዘዔማ እስከ ኣስተብህል” ብምባል’ውን ወጠረትኒ። ግር ከም ዝበለኒ ስለ ዘስተብሃለት’ዩ መስለኒ፡ ”ብቕልል ዝበለ ኣዘራርባ፡ ንሓሳብካ፡ ስፍሕ-ምልእ ኣቢሉ ሒዝዎ ዘሎስ፡ ኣየናይ እዩ፧ ምሸት ዶ ብጊሓት፧ ካልአይቲ መዓልቲ ዶ፡ ወይስ እቲ ‘ኰነ’ ዝብል ቃል፧” ብምባል ኣስተንፈሰት።   

“ንገርኒ እንዶ፧ ኣዒንትኺ ኣበይ’የ ኣዒመን ዘለዋ፧” ብምባል፡ ንሕቶኣ ብሕቶ ደበስክዎ። ”ኣነ ደኣ፡ ኣብቲ ዓይኒ ዘይትርእዮ፡ ግናኸ ልዕሊ’ቲ ጽሑፍ ደሚቑን ጐሊሑን ዝንበብ ዘሎ’የ፡ ዘስተንትን ዘለኹ” በለትኒ። ኣይተገረምኩን። ”ዘይተጻሕፈ ምንባብ ማለት ከ ደኣ ከመይ ማለት’ዩ፧” ዝብል ሓሳብ ግና፡ ንውሽጠይ ሃወኾ።

”ምቝጻር ኣዋርሕን መዓልትታትን ውሒዱካስ፡ ነታ ናይ መወዳእታ ካልኢት ብምሕላው፡ ብዕልልታን ጣቕዒትን ብዝላን ንጥራን፡ ብሆሆን ሆይሆይታን እምበኣር ጸምቢልካያ፧” ገዓረት። ኪንዮ ድንን ምባል፡ ካልእ ምላሽ ኣይነበረንን። 

ካርተሊናታት ሓድሽ ዓመት

ብምኽንያት ሓድሽ ዓመት፡ ካርተሊናታት ኣዳልዮም ”እዚኣ ዓመት ዕልልታ’ያ!” ዝብሉ እንካ ታእላው የብሎምን እንድዮም፡ ”ዓመተ ምብላጽ፡ Year of excelence” ”ዓመተ ምብጻሕ፡ Year of visitation” ወዘተ ዝብሉ’ውን ኣይተሳእኑን። ብዛዕባ’ዚ እናሓሰብኩ “ከምዚ ወለድና፡ ሓዊ እናተሳገሩ፡ ‘ቍራዕ ሓምሊ ውጻእ’ ዝብልዎ ዓይነት ምዃኑ ኣይትዘንግዕ። ጸጽቡቑ ዝምነ፡ ቃላት መመሪጹ ሓሳባት እንተወቀጠ ዝጽላእ ኣይኰነን” ሓሳባ ወስ ኣበለት ብርዐይ። ”ንመለስ፡ ንነሳሕ፡ ኣካይዳና ነጸብቕ፡ ዕሽነት ንሕደግ፡ ብጐደና ጥበብ ንመላለስ፡ ስም ጐይታ ኣይነጽርፍ፡” ወዘተ ዝብል፡ ለባም መኻሪ እንተጐኒፉካ ግና፡ ኣብተን ናይ ሓድሽ ዓመት ዝተላእካልካ ካርተሊናታት ሃሰስ በል’ሞ እስከ ጽወየኒ ድማ” በለትኒ።

”ምሸት ኰነ ብጊሓት’ውን ኰነ፡ ካልአይቲ መዓልቲ” ዝብል ምስ ነበብኩ’ያ፡ በዚ መጺኣ ከይበልክዋ ኣብ ጐነይ ኮፍ ዝበለት። “በዛ መዓልቲ እዚኣ፡ ንማያት ካብ ማያት ዝፈሊ ጠፈር ተገብረ፣ ‘ሰማይ’ ተብሂሉ ድማ ተሰምየ፡” ዝብል፡ ንመዘከርታ ዝኸውን ጽሑፍ እናስፈርኩ፡ ”’ሰማይ ዝተደኰነሉ መዓልቲ፡’ ቢልና እንተጸምበልናዮ ከመይ ይመስለካ፧” ብምባል ኣቃጨጨትለይ። ጠሚተያ ጥራይ ስቕ በልኩ።

ምዝማር ልማደይ’ዩ’ሞ፡ እናፋጸኹ፡ እንሓንሳእ’ውን ብዓውታ እናተዳሃኹ፡ ”ኣነ ንዓኻ ዝፈለጥኩላ መዓልቲ፡ እባርኻ’ለኹ እናበልኩ፡ ትኹን ብርኽቲ” ምዝማር ተተሓሓዝክዎ። ”ንመን ኢኻ ትባርኽ ዘለኻ፧” ሓተተት ብርዒ። ”ነታ ምድሓን ዝረኸብኩላ መዓልቲ፡ ነታ መዓልቲ ምድሓን” ዓይነይ ከይሓሰኹ፡ መለስኩላ። ”እታ መዓልቲ ምድሓን ሕጂ’ያ!” ክብላ እናተደናደንኩ ከለኹ ኸኣ፡ ”ካን ኣኺሉካ፡ ንፊደላት፡ እምበር ነቲ መልእኽትስ ከይተስተብሃልካሉ ክትነብር፧!” ገንሐትኒ። ”ከመይ ማለትኪ’ዩ፧” ምስ በልክዋ፡ ገጻ ብታሕጓስ ኣንጸባረቐ።

”ምሸት ኰነ ብጊሓት’ውን ኰነ፡ ካልአይቲ መዓልቲ” ዝብል ምስ ነበብካ፡ እቲ ”ኰነ” ዝብል ዘሎ፡ ብገዛእ ርእሱ ከም ዘይኰነ ተስተብህለሉ ዶ፧! ብርግጽ ’ብእግዚኣብሄር ኰነ’ ዝብል ኣብቲ ጽሑፍ ኣይርከብን’ዩ። ኣብቲ መንፈስ ናይቲ መልእኽቲ ግና ደሚቑን ጐሊሑን ዝንበብ ንሱ እዩ። ነቲ ጽሑፍ ካብ ላዕሊ ሒዝካ እንተነቢብካዮ፡ ’ኣምላኽ ብመጀመርታ ሰማይን ምድርን ፈጠረ’ ቢሉ’ዩ ዝጅምር’ሞ፡ ንኹሉ እቲ ስዒቡ ዝኸውንን ዝፍጠርን፡ ኣምላኽ ከም ዝገበሮ ከተስተብህል ይግብኣላ። ስለዚ ድማ ብምድሓንካ ከተመስግን፡ ክትባርኽ እንተደሊኻ፡ ነቲ ዘድሓነካ ጐይታ ደኣ እምበር፡ ነታ ኣብ ምድሓንካ ዝኾነ ኣበርክቶ ዘይገበረት ’መዓልቲ’ ክትባርኻ ትርጉም ዘሎዎ ኣይኰነን” ብምባል ሃዲኣ ኣረድአትኒ።

“ነዛ ቅድሚ ትማል-ምሸት ዝጸምበልካያ መዓልቲ፡ ‘ኣቡነ እከለ፡’ ዝብል ስም ሒዛ መጺኣትካ እንተትነብር፡ ቅርብ ኣይምበልካያን። ‘መእተዊት ሓዳስ ዓመት’ ብዝብል እንተመጸትካ ግና፡ ፍልይቲ መዓልቲ ብምባል፡ ብኽብሪ ጸምበልካያ፡ ተቐበልካያ፡ ዓለልካላ፡ ዘለልካላ፡ እንታይ ከ ዘይኰንካላ፧! ሰብ ገላትያ ደኣ እንታይ ካልእ ዶ ጌሮም’ዮም፧ እስከ ነቲ ፍቕራዊ ተግሳጽ ጳውሎስ ደጊምካ ንበቦ” ብምባል፡ መልእኽቲ ናብ ሰብ ገላትያ ገንጺላ፡ ራብዓይ ምዕራፍ ኣቕረበትለይ። ”ሕጂ ደኣ፡ ንኣምላኽ ምስ ፈረጥክምዎ፡ ምናዳውን ንሱ ምስ ፈለጠኩም፡ ከመይ ኢልኩም ናብቲ ሕማቕን ድኻን ምህሮ ቝልዕነት ከም ብሓድሽ ትምለሱ ኣለኹም፡ ከም ብሓድሽ’ውን ካብ መጀመርታ ሒዝኩም ባሮቱ ኽትኰኑ ትደልዩ አሎኹም፧ መዓልትታትን ኣዋርሕን ጊዜታትን ዓመታትን ትሕልዉ ኣለኹም። ኣባኻትኩም ምናልባሽ ንኸንቱ ጽዒረ ኸይከውን፡ ብዛዕባኹም እፈርህ አሎኹ (ገላ4.9-11)።

ነቢበ ውድእ ብዘበልኩ፡ ”ደጊም ንሰብ ገላትያ፡ ዕዙማት ምባል ኣቋርጽ፡ ንገዛእ ርእስኻ ግና ርአ፡ ሰብ ገላትያ፡ ቀልጢፎም ናብ ካልእ ወንጌል ምግልባጦም ኣየገርምካ፡ ምናልባሽ ናትካ ካብ ናታቶም ዝገደደ ኰይኑ ከይህሉ ግና ርእስኻ ፈትሽ” ብምባል፡ ከምታ ከይረአኽዋ ሃንደበት ደበኽ ዝበለት፡ ሕጂ’ውን ሃንደበት ተሰወረት።