ዓስረይቲ መዓልቲ፡ ልበይን ገጽካን

ኣስተንትኖ 43 መዓልትታት ጾመ-ታሕሳስ

25 ሕዳር 2023 ዝጀመርናዮ ጾመ ታሕሳስ፡ ክሳዕ’ቲ ዝኽሪ ልደት ጐይታና እንዝክረሉ ዕለት’ዩ፡ ከጓዕዘና። “ንእግዚኣብሄር ሓንቲ ነገር ለሚነዮ። ውቃበ እግዚኣብሄር ንምርኣይ፣ መቕደሱ’ውን ንምምርማርሲ፡ ምሉእ ዕድመይ ኣብ ቤት እግዚኣብሄር ክነብር ደልየ አሎኹ” (መዝ27.5)።

ውቃበ ተባሂሉ ዘሎ፡ ማራኽን ፈቃርን ዝዀነ ጽባቐ ማለት’ዩ። እዚ ዘማሪ’ዚ ንእግዚኣብሄር ዝገልጸሉ ቃላት ኣዝዩ ዘገርም እዩ። እግዚኣብሄር ብርሃነይን ምድሓነይን እዩ፡ እግዚኣብሄር ሓይሊ ህይወተይ እዩ፡ ኣቦይን እኖይን እኳ እንተ ዚጥንጥኑኒ፣ እግዚኣብሄርሲ ይእርንበኒ እዩ፡ ወዘተ እናበለ ድማ’ዩ ዘስተንትን። እቲ ዘማሪ፡ ነታ መዝሙር ክዓጽዋ ከሎ፡ ”ብእግዚኣብሄር ተሰፎ፣ በርትዕ፣ ልብኻ ቀጥ ይበል፣ ኣጆኻ፣ እወ፣ ብእግዚኣብሄር ተስፋ ግበር” ምባሉ፡ ንባዕሉ ምስ እግዚኣብሄር ዘሎዎ ቅርበት፡ ኣጕሊሑ የርእየና። ኪቃወመኒ ኢሉ’ኳ ሰራዊት እንተዚሰፍር፡ ልበይ ኣይፈርህን እዩ፡ ኵናት’ውን እንተዝልዓለኒ፡ እምነት አሎኒ ብምባል ድማ ትውክልቱ ምሉእ ምዃኑ የረጋግጽ።

እቲ ተስፋ ዝሃበና የሱስ፡ ብርግጽ ክምለስ’ዩ፡ ማራን ኣታ! ናፍቖትና፡ ምጽብባይና ግና ከመይ ኮን ይህሉ፧!

ዝንበብ ክፍሊ:-

መዝሙር 27

ንጸሊ፦

ዎ እግዚኣብሄር፣ ንድምጸይ ስምዓዮ፣ ኣባኻ እምህለል አሎኹ፣ ምሐረኒ እሞ ምለሰለይ። ልበይ ኣብ ክንዳኻ ኰይኑ፡ ንገጸይ ድለዮ ይብለኒ ኣሎ። ዎ እግዚኣብሄር፡ ንገጽካ እደልዮ እኔኹ። ገጽካ ኣይትሕብኣለይ፡ ንባርያኻ ብቝጥዓ ኣይትደርብዮ፡ ንስኻ ረዳተይ ኢኻ እሞ፡ ዎ ኣምላኽ ድሕንነተይ ኣይትጠንጥነኒ፡ ኣይትሕደገኒ። ብስም ኣብን ወልድን መንፈስ ቅዱስን ሓደ ኣምላኽ ኣሜን!